91Amos say: “Jalike one dream, I wen see my Boss. He real big an awesome, an he stand right dea ova da altar fo da sacrifice. He say dis:
‘Go wack da top a da main pos inside da temple!
So dat eryting undaneat da pos shake an fall down!
Bus um up so da whole ting fall down
Bring um down on top da head
A all da peopo dat stay still yet inside da temple!
Anybody stay alive still yet,
I goin kill um wit da sword.
No mo nobody goin get outa dea,
No mo nobody goin run way!
2‘No matta dey dig way down inside da Mahke Peopo Place,
I goin pull um back outa dea wit my hand.
No matta dey go up to da sky,
I goin pull um back down from dea.
3No matta dey go all da way on top Mount Carmel
An hide ova dea so nobody can see um,
I goin find um an drag um back.
No matta dey stay hide from me on da bottom a da ocean,
I goin tell da sea snake wat fo do
An he goin go afta um an bite um.
4No matta da guys dat stay agains um make dem come prisonas
An walk all da way to anodda country,
I goin tell da peopo ova dea fo kill um wit swords.
I goin watch fo make shua dat bad tings happen to dem,
Not good tings.’-”
Dass wat Yahweh say.
God Get Power Fo Punish
(Amos 1:2, 4:13, 5:8-9)
5“My Boss Yahweh,
Da God Dat Stay In Charge Ova All Da Armies,
Wen he touch da world, jalike da world melt,
An erybody dat stay live inside da world come real sad.
Da land move up an move back down
Jalike da Nile Riva Egypt side.
6Yahweh, he build da top part a his house inside da sky,
Da arch go all da way up from da earth.
He tell da watta fo come up outa da ocean,
Den he pour um out on top da groun.
Yahweh, dass his name,
Cuz dass who him!”
God Punish, An God Make New
Da Israel Peopo Not Mo Betta Peopo Den Da Odda Peopos
7Dis wat Yahweh say:
“Eh you Israel peopo!
Fo shua, I no make diffren to you guys
An to da peopo from da Sudan land!
I wen bring you Israel peopo up hea outa da Egypt land,
I wen bring da Filistine peopo from Crete Island too,
An da Aram peopo, I wen bring dem from Kir side.
8You know wat? Me, I Yahweh, yoa boss,
An I stay watching yoa land,
Cuz all da peopo ova dea stay do wrong!
Fo shua, I goin wipe out dat land all da way,
All da peopo dat come from yoa ancesta guy Jacob!”
Dass wat Yahweh tell.
9Yahweh say dis too:
“You know wat I goin do?
I da one dat goin say da ting
Fo make da peopo dat stay agains you guys
Throw you Israel peopo outa yoa land
An make you go diffren countries fo live dea!
Goin be jalike wen somebody shake one straina
An all da good stuff no fall down to da ground.
10Goin get war,
An all my peopo dat do wrong goin mahke.
Dey da ones dat say,
‘Notting bad goin happen to us guys!
All dat bad kine stuff no goin catch us up!’
God Goin Make Da Israel Peopo Come New
(Amos Jesus Guys 15:16-18)
11Plus, Yahweh say dis:
“Dis peopo dat had King David fo dea king befo time,
Now dey all mess up, jalike one shack ready fo fall down.
But goin come da time,
I goin fix up dea land jalike King David time was.
Jalike da peopo fix one wall dass all broke an fall down,
I goin fix dat wall dat was all bus up
An put up da tings dat wen broke.
I goin build um jalike was befo time.
12Cuz a dat, da Israel peopo goin take ova da odda part a da Edom land
An all da odda countries dat was mines befo time.”
Dass wat Yahweh tell, da One who goin do all dat.
13An you know wat? Yahweh say dis too:
“Goin come da time,
Wen dey plant stuff, goin grow so quick
Da firs part goin be ready fo cut
Befo dey even ready fo plant da odda part!
Even wen time awready fo make ready da grape seeds
Fo plant da next time
Dey still no goin pau step all da grapes dey get
Fo make wine, from da las time!
Goin get so plenny juice from da fresh grapes,
Goin run down da hills
An make da hills look jalike dey stay melting all ova da place!
14I goin bring my Israel peopo back
From da place wea dey stay prisonas.
Dey goin build again da towns dat was all bus up.
Dey goin make house dea, an plant grape fields
An drink da wine dat dey make dea.
Dey goin plant gardens
An eat da fruits dat grow dea.
15I goin put my peopo on top dea own land
Jalike I planting um dea.
An nobody goin throw um outa dea land, eva.
Cuz I wen give um dat land.”
Dass wat Yahweh say, an he da God fo dem!
Copyright © 2000, 2009 Wycliffe Bible Translators
Fo buy Da Jesus Book, make click hea