661Dis wat Yahweh tell:
“Da sky, jalike one throne wea I sit down.
Da earth, jalike one stool wea I put my feets on top.
Wea da house you guys goin build fo me?
Wea I goin res?
2You guys know dat I wen make
Eryting dat get, da sky an da eart, yeah?
Az how come dey stay hea.”
Yahweh da One tell dat.
“I tell you, wat kine guys
I like lissen to!
Da kine guys dat get plenny trouble
An no can handle,
An dey stay all bus up inside,
An stay scared an shaking
Wen dey hear wat I tell.
Dey do dea own tings fo do,
An feel real good inside
Wen dey doing dat kine pilau stuff.
[Fo / Wit] dem, wen dey kill one cow fo make sacrifice,
Az bad, cuz az jalike dey wen kill one guy.
Wen dey kill one bebe sheep fo make sacrifice,
Az bad, cuz az jalike dey wen broke one dog neck.
Wen dey give one wheat offering,
Az bad, cuz az jalike dey wen give pig blood fo sacrifice.
Wen dey burn incense fo God rememba dem,
Az bad, cuz az jalike dey stay talk good bout dea idol kine god.
I goin do my own way an punish dem!
I goin make tings happen to dem
Dat dey stay scared awready goin happen.
I goin do all dat,
Cuz wen I wen call dem,
No mo nobody dea fo answa me.
An wen I wen talk to dem,
No mo nobody lissen.
Dey do stuff dass bad, da way I see um.
Dey pick da kine stuff fo do,
Dat I no like!”
5You guys dat stay scared an shaking wen Yahweh talk,
Lissen to wat he tell:
“Da odda Israel guys dat hate you guys,
Dey no let you guys stay wit dem
Cuz you know wat kine God me.
Dey make fun a you guys, an tell,
‘Good, you show respeck fo Yahweh!
We like see you guys stay good inside!’
But dey da ones goin come shame!”
6Lissen! Get plenny noise from da town,
An from da temple.
Az da noise Yahweh stay make
[Fo / Wen he] pay back da guys dat stay agains him!
7“Da ting dat goin happen fo Jerusalem town,
Goin be jalike one wahine dat goin born one bebe,
Befo she even start fo get labor pain!
Even befo da labor pain even come to her,
She get one boy!
8Nobody hear dat kine ting befo!
Nobody see dat kine stuff befo!
No can make one whole country in one day!
No can make one peopo in one minute!
But da Jerusalem peopo on top Mount Zion,
Dey jalike one wahine, her kids ready fo come,
An she born um quick time.”
9Yoa God Yahweh tell: “You tink I goin no let dis nation come,
Jalike fo one wahine start fo born one bebe,
An no let da bebe come?! No way!
I da One make her born um,
So how come you tink I goin hold her back?! Not even!”
10All you peopo dat get love an aloha
Fo da Jerusalem peopo,
Dance an sing wit dem
An stay good inside!
Show erybody how you feel good jalike dem,
No matta befo time you wen stay sore inside.
11Cuz bumbye, you guys goin be
Jalike one bebe dat stay nurse at da mudda's breast,
An no worry bout notting no moa,
Cuz get plenny fo drink.”
“You know wat?!
I goin make eryting come out good fo da Jerusalem peopo,
Jalike one big riva
Wit watta all da time!
I goin bring plenny rich kine stuff from plenny countries,
Jalike wen da watta fill up one stream
An den go all ova da place!
An da Jerusalem peopo goin be
Jalike da mudda fo all you guys,
An you guys jalike one bebe dat stay nurse,
An da mudda carry um all ova in her arm,
An bounce um on top her knee.
13Jalike one mudda help her boy res inside,
Even afta he grow up an come big,
I goin do same ting fo help you guys res inside.
Wen you guys stay Jerusalem town,
I goin let you res inside!”
14Wen you guys see all dis,
Yoa heart goin feel like stay jump
Cuz you stay real good inside!
An yoa body goin feel real good
Jalike wen da new grass come up.
Da peopo dat work fo Yahweh,
Dey goin know wat kine power Yahweh get.
But da peopo dat stay agains Yahweh,
Dey goin find out how feel
Wen he no take wat dey do.
Wen Yahweh come, he goin come wit fire!
His war wagons goin come
Jalike one strong wind storm!
He goin come fo pay back
Da peopo he stay real huhu wit.
He goin bring da big fire
Fo tell um stop doing bad kine tings.
16Yahweh goin use da fire an his sword
Fo punish all da peopo jalike one judge.
Yahweh goin wipe out plenny peopo.
17“Get peopo dat do religious kine stuff
Fo make demself spesho fo da idol kine gods,
An fo come so dey can go in front dea gods
Inside da places wit trees wea dey pray.
Dey follow one leada guy fo go inside da middo.
Den dey eat kapu kine stuff togedda,
Pig meat an rats.
Dey all goin mahke togedda.”
Az wat Yahweh tell.
Eryting dey do, an eryting dey tink.
I ready fo come
Fo bring togedda all da diffren peopos
An all diffren languages.
Wen dey come, dey goin see
How awesome I stay.
19“I goin do awesome ting wea my peopo stay. Den I goin send some a da peopo dat still yet stay alive to da odda countries: to Spain, an Pul, an Lud (wea get plenny guys dat know how fo use da bow an arrow), an Tubal, an Greece. Dey even going to islands dat stay far away, wea da peopo dea neva hear bout me, an neva see how awesome I stay. Dey goin tell da diffren peopos ova dea, how awesome I stay.
20Da peopo I send, goin bring all yoa brudda guys from all da countries to Jerusalem, da mountain dat stay spesho fo me. Wen all dem come, dat goin be jalike one wheat sacrifice fo tell me, ‘Yahweh, mahalo plenny!’ Dey goin come on top horses, in war wagons an wagons wit top, an on top mules an camels.” Az wat Yahweh tell. “Dey goin bring dem jalike da Israel peopo bring dea wheat in clean baskets fo make sacrifice inside da Temple Fo Yahweh.
21An I goin take some a da ones dat come, fo be pries guys an helpa guys jalike da Levi ohana.” Az wat Yahweh tell.
22“Jalike da new sky an da new earth dat I stay ready fo make, goin stay long time in front me, da peopo dat goin come from you guys, goin stay long time, an peopo goin rememba you guys name long time too.
23All da time, ery new moon time an ery Res Day, all da peopo all ova da world goin come an go down in front me.” Az wat Yahweh tell.
24“Wen peopo go outside Jerusalem, dey goin see all da mahke bodies a da peopo dat wen go agains me. Da worm dat stay eat dem no goin mahke, an da fire dat burn dem no goin pio. Erybody goin feel pilau wen dey see da bodies.”