God Make Isaiah Clean Inside An [God] Call Him Fo Work Fo Him
(Matthew 13:14-15; Mark 4:12; Luke 8:10; John 12:40; Jesus Guys 28:26-27; Jesus Show 4:8)
61Da same year King Uzziah wen mahke, I see my Boss Yahweh sitting on top one throne, way far up dea inside da sky, an looking real importan. An da bottom a his robe fill up da Temple. 2Angel guys dat look like fire, fly up all aroun him. Each one get six wings. Dey cova dea face wit two a dea wings, dea feets wit da odda two wings, an dey fly wit dea two wings. 3Ery angel guy call to da oddas,
“Good an Spesho! Spesho! Spesho!
Dass Yahweh, Da God Ova All Da Armies,
How good an spesho he stay!
Eryting inside da whole world,
Show how awesome he stay!”
4Wen dey yell strong lidat, even da foundation unda da Temple door stay shake an da Temple fill wit smoke.
5Den I wen yell,
“Auwe fo me!
I stay wipe out awready!
Da way I stay talk,
An da way da peopo I stay wit stay talk,
No way us can come in front God!
But still yet, I wen see
Yahweh da King, Da God Ova All Da Armies.”
6Den one a da angel guys dat look jalike fire, fly ova by me wit one red hot charcoal. He wen take um from da altar wit tongs. 7He touch da hot charcoal on top my mout an tell,
“Now dis charcoal wen touch yoa mout,
All da bad tings you wen do, stay gone awready.
God wen pay da price
Fo hemo from you all dat bad kine stuff.”
8Den I hear my Boss tell,
“Who I can send?
Who goin go fo us?”
An I tell,
“Me, I can go,
Send me.”
9An he tell me,
“Go den. Tell da peopo dis:
‘Lissen plenny, but you no goin undastan notting!
Look plenny, but you no goin learn notting!’
10Make dem so dey no can tink good,
Make dem so dey no can hear good,
An shut dea eyes so no can see good.
I no like fo dem see wass happening,
I no like fo dem start fo lissen,
An fo tink good.
Cuz if dey wen change,
Den dey goin come good,
But dey no goin change.”
11Den I aks him, “Boss, how long I gotta do dat?”
An he tell,
“Till all da towns stay all bus up
An no mo peopo live dea,
An all da house, no mo peopo inside,
An all da land stay dry an all wipe out.
12No stop talking till me, Yahweh,
Send all da peopo far away place,
An get plenny place all ova da land
Wea da peopo leave eryting an go way.
13But even if still yet get ten percent da peopo dat stay on top da land,
Da army guys goin come back one mo time
An burn eryting.
But, jalike da terebint tree an da oak tree still ony get stump
Wen somebody cut um down,
Da peopo dat still stay dea,
Goin come jalike one spesho seed fo God,
Jalike da stump dat goin grow one mo time.”
Copyright © 2000, 2009 Wycliffe Bible Translators
Fo buy Da Jesus Book, make click hea