Da Jesus Book cova    From Da Bible      Da Jesus Story CD cova

Wat Da Bible Say Bout Plenny Stuffs

Real Kine Life   God   Jesus   Da Bible   Praying   Do Wat Christ Like

Da Real Kine Life
 
Trus Jesus: Jesus say, "God wen get so plenny love an aloha fo da peopo inside da world, dat he wen send me, his one an ony Boy, so dat everybody dat trus me no get cut off from God, but get da kine life dat stay to da max foeva." (John Tell Bout Jesus 3:16)

I like everybody fo tell how good God our Fadda an his Boy, da Boss Jesus Christ, stay. God, his Fadda, he give us guys plenny chance. Wen Jesus Christ wen mahke, he wen come back alive again. So den, Christ wen make us live new kine life, jalike we wen born one mo time. Dass why we stay trus Christ, cuz we know fo shua he goin take care us bumbye. (Da Numba 1 Letta from Peter 1:3)

Da Fadda stay live fo real kine, an he wen send me hea. I stay live too, cuz he make me live fo real kine. Whoeva take me, same ting, dey goin live, cuz I goin make dem live fo real kine. (John 6:57)

But da angel guy say, “No scared. I come fo tell you guys Good Stuff From God dat goin make you guys an all da peopo stay good inside. Dis day inside King David's town, one boy wen born dat goin take you guys outa da bad kine stuff you stay doing. He da Christ Guy, da Spesho Guy God Wen Send. He da Boss." (Luke Tell Bout Jesus 2:10-11)

Den had one big storm ova dea, an da waves was bussing ova da boat, so da boat almos wen huli. But Jesus still yet stay sleeping in da back on one pillow. His guys wen go wake him up, an tell him, “Eh, Teacha! You no care we goin mahke, o wat?”
Jesus get up, an scold da wind an da waves. He say, “Quiet! No move aroun!” Den da wind wen pau an da waves wen come nice. An he tell his guys, “How come you guys scared? You guys no trus me, o wat?” (Mark Tell Bout Jesus 4:37-40)

Jesus tell dem, “Da stuff I teach, no come from me. Come from da One who wen send me. If anybody like do wat God like um fo do, dey goin know if da stuff I teaching come from God, o if ony come from my own head." (John Tell Bout Jesus 7:16-17)

Den Jesus tell um one mo time, “You guys wen undastan dat? Kay den, I like tell you guys dis too: I jalike da gate fo da sheeps. All da odda guys dat wen come befo me, dey jalike steala guys. But da sheeps neva listen to dem guys. I jalike da gate. If anybody trus me, God goin take um outa da bad kine stuff dey stay in, an let um go. Dass jalike dey goin go inside God's place by me, da gate. An dey goin go wea eva dey like an find food fo eat. Da steala guy, he ony come fo steal, kill, an bus up da place. But I wen come so da peopo can come alive inside, an live to da max." (John Tell Bout Jesus 10:7-10)

Jalike I wen mahke wit Christ on top da cross. Now dass not me dat stay live no moa, but Christ stay live inside me. I get da real kine life dat stay to da max foeva inside my body now, cuz I stay trus God's Boy. He get plenny love an aloha fo me, an he wen give himself fo mahke fo me. (Fo Da Galatia Peopo 2:20)

Come tight wit me, jalike I stay tight wit you guys. Da branch no can make fruit if no stay tight wit da vine. Same ting, you guys no can do notting if you guys no stay tight wit me. (John Tell Bout Jesus 15:4)

Tink hard bout wat I telling you. Cuz da Boss, he goin make shua you undastan everyting I say. So tink plenny bout Jesus, da Spesho Guy God Wen Send. He da One dat wen come from King David ohana. God wen make him come back alive, afta he wen mahke. An dass da Good Kine Stuff From God dat I stay telling everybody. (Letta Numba 2 Fo Timoty 2:7-8)

Eh, bruddas an sistas! We like you guys know da trut bout God's peopo dat stay mahke awready. Den you guys no need feel real sore inside, jalike da odda peopo feel dat no stay shua bout wat God goin do bumbye. Us guys believe dat Jesus wen mahke, an afta dat, he wen come back alive. Dass why we believe dat God goin bring da peopo dat was Jesus guys befo dey wen mahke, fo stay wit him. (Numba 1 fo da Tessalonika Peopo 4:13-14)

Jesus say, "Fo go inside God's place, go inside thru da skinny gate. Get one nodda gate dat stay wide an get plenny room. Dass da gate fo da road fo take you to Hell, an get plenny guys going dat way. But da real gate stay skinny an da real road mo smalla. Dass da one fo bring you to God who goin make you live fo real kine, an ony litto bit guys goin pick dat road." (Matthew Tell Bout Jesus 7:13-14)

Stay good inside everytime. No matta wat happen, make time fo talk to God everytime. No matta wat happen, tell God “Mahalo plenny!.” Dass wat God like you guys do, cuz you guys stay tight wit God's Spesho Guy Jesus. (Numba 1 fo da Tessalonika Peopo 5:16-18)

Three times awready I wen beg God da Boss fo take dis ting away from me. But he wen tell me, "I do plenny good tings fo you, an dass all you need. My power mo strong inside you wen you no can handle trouble yoa own self." Dass why I goin talk big even moa, cuz get plenny stuff I no can handle. Dass how Christ's power goin stay wit me. (Numba 2 fo da Corint Peopo 12:8-9)

Jesus wen do plenny odda awesome stuff fo show who him, but I neva write all dat inside dis book. But da tings I wen write, I write um so you guys goin believe dat Jesus da Christ guy, da Spesho Guy God Wen Send, an he God's Boy. Wen you guys trus him, you guys goin live foeva fo real kine cuz you his guys. (John Tell Bout Jesus 20:30-31)

Jesus tell her, “I da Guy dat make peopo come back alive an stay live fo real kine. Whoeva trus me goin come alive, no matta dey mahke. Whoeva stay live fo real kine an trus me, dey no goin mahke inside, eva! You believe dat, Marta?” (John Tell Bout Jesus 11:25)

Da real kine life stay foeva: Eh, bruddas an sistas! We like you guys know da trut bout God's peopo dat stay mahke awready. Den you guys no need feel real sore inside, jalike da odda peopo feel dat no stay shua bout wat God goin do bumbye. Us guys believe dat Jesus wen mahke, an afta dat, he wen come back alive. Dass why we believe dat God goin bring da peopo dat was Jesus guys befo dey wen mahke, fo stay wit him. (Da Letta Numba One From Paul Fo Da Tessalonika Peopo 4:13-14)

“Now God make house wit da peopo.
An he goin live wit dem.
Dey goin be his peopo,
An God goin stay dea wit dem fo real, an be dea God.
God goin wipe away all da tears from dea eye.
Nobody goin mahke no moa.
Nobody goin stay sore inside, o cry, o suffa,
Cuz da way tings wen happen befo,
All dat goin pau.” (Wat Jesus Show John 21:3-4)

Dass why you guys feel plenny good inside, no matta now fo litto wile you guys gotta suffa plenny, cuz you get all kine hard time. Stay happening lidat, so dat everybody goin see dat you guys trus God fo real. Jalike dey put da gold inside da fire fo wipe out all da junk stuff. Dass jalike why you guys suffa now, fo wipe out da junks you guys get inside, an fo show everybody dat you guys trus God fo real. All dat mo betta den da gold. Cuz bumbye wen Jesus Christ come back, da peopo goin tell how awesome he stay, an dey goin get plenny respeck fo him. (Numba 1 Letta From Peter 1:6-7)

So den, God wen make one promise, dat he get one place dat he like give us fo “go rest inside.” An dat promise still stay solid. So den, watch out dat some a you guys no mess up, an den you guys no goin get da kine rest God wen promise you guys. (Fo Da Hebrew Peopo 4:1)

You guys gotta hang in dea. An afta you guys do everyting dat God like you guys fo do, den bumbye you guys goin get da stuff he wen promise. (Fo Da Hebrew Peopo 10:36)

Copy Jesus: [Jesus say:] "I give you guys one new ting you gotta do: show love an aloha fo each odda. Jus like I get love an aloha fo you guys, dass how you guys gotta get love an aloha fo each odda. If all you guys get love an aloha fo each odda, den everybody goin know you my guys." (John 13:34-35)

Eh, Timoty my boy! You gotta be strong inside, you know! You stay tight wit da Spesho Guy God Wen Send, Jesus Christ, an he stay do good tings fo you, so you can come strong inside. (Letta Numba 2 from Paul fo Timoty 2:1)

My friends, no bum out if you suffa plenny. Dass fo check you guys out how you stay inside. No tink you da ony one dat suffa plenny lidat. But you can stay good inside, cuz you suffa togedda wit Christ. Den bumbye you goin come plenny good inside wen everybody see how awesome he stay. (Letta Numba 1 From Peter 4:12-13)

Eh, wen God wen tell us, “Come! Be my guys!” he neva do dat so we can go do pilau kine stuff! He tell us dat so we can come his peopo, good an spesho fo him. (Letta Numba 1 Fo Da Tessalonika Peopo 4:7)

No let da bad kine stuff take ova you, an make you do any kine stuff yoa body like. Dat body goin mahke, you know. An no go let notting inside you go do stuff dat no stay right, cuz dass bad. Jus let God make you do wat he like. Cuz jalike you wen go mahke awready an now you stay alive again. Use yoa whole body fo do da kine stuff you suppose to do, fo God. (Fo Da Rome Peopo 6:12-13)

Go all out fo make nice to everybody, an no bodda odda peopo. Take care yoa own stuffs, an work wit yoa own hands, jalike we wen tell you guys awready. Den da peopo outside dat no trus God, dey goin see how you guys ack, an dey goin get respeck fo you guys. An you guys no goin need notting from nobody. (Numba 1 fo da Tessalonika Peopo 4:11-12)
 

Real Kine Life   God   Jesus   Da Bible   Praying   Do Wat Christ Like

God

He get love an aloha fo us guys: "God like do plenny fo you guys, cuz dass how he stay. He like hemo you guys from da bad kine stuff you guys stay in, if you guys trus God strait out. No mo notting you guys can do by yoaself. God make lidis fo you guys. Dass jalike one spesho present God get fo you guys. Da tings you do by yoaself, eh, no talk big, cuz no worth notting. God da One wen make us guys how we stay now. He wen make us stay tight wit Jesus Christ, so now us guys can do good kine stuff. Even befo he wen make us, he wen make ready all da plans fo us guys fo do all dose good tings." (Fo da Efesus Peopo 2:8-10)

Let God take care all da stuff you guys worry bout, cuz he get big heart fo you guys. (Numba 1 from Peter 5:7)

Our God wen tell you guys awready, “Come! Be my guys!” Dass why we stay aks God fo make you guys da right kine peopo so you can do wat he like. We pray fo God's power fo help you guys do all da good kine stuff you like do cuz you guys stay trus him. Den, wen you guys make lidat, everybody goin say good tings bout our Boss Jesus, cuz dey goin know how awesome he stay. An cuz a him, dey goin say good tings bout you guys too. All dat goin happen cuz our God, an da Boss Jesus, God's Spesho Guy, dey like do plenny fo you guys. (Numba 2 fo da Tessalonika Peopo 1:11-12)

We get plenny rich kine stuff from God inside us, no matta we jus regula kine peopo. Dat show dat da big power come from God an not from us guys. Dass jalike wen somebody get rich kine stuff inside cheap clay bowls. (Letta Numba 2 fo da Corint Peopo 4:7)

Befo God wen make da world, he wen pick us awready fo be his guys an fo stay tight wit Christ. He wen like us be good an spesho fo him, so den no goin get nobody fo poin finga us guys. God know everyting bout us guys. He get choke love an aloha fo us. (Fo da Efesus Peopo 1:4)

God da One dat get da right fo say dat whoeva trus him, dey da one dat get um right wit him, no matta dey neva care bout God befo time. No can work fo get um right wit God, ony gotta trus God, an den God goin say dat you stay right. (Fo da Rome Peopo 4:5)

Cuz God wen show everybody he get good heart fo help dem, an dass why he can take everybody outa da bad kine stuff dey stay doing. (Da Letta From Paul Fo Titus 2:11)

Can know God: Jesus say, "Dis wat da kine life mean dat stay fo real kine foeva: dat da peopo dat get dat kine life know you, da ony God dass fo real, an dat dey know me too, Jesus Christ, da Spesho Guy You Wen Send." (John Tell Bout Jesus 17:3)
"Everytime, dis how I pray: "God, you da God fo our Boss Jesus Christ. You our Fadda, an you stay awesome! I like you help da Efesus peopo fo know inside dea hearts wat fo do. An show dem plenny bout Christ, so dey goin know him mo betta.'" (Fo da Efesus Peopo 1:17)

"So, come near by God, an he goin come near by you. No matta you guys was all no good inside befo time! Now go clean yoaself up, jalike you stay washing yoa hands real good. No matta you guys wen ack befo time jalike you get two brains. Now, you gotta make yoa heart all clean fo God!" (James 4:8)

No fool yoaself! If you tink you know an undastan everyting jalike all da peopo nowdays, dat mean, you donno notting. Wen you figga you donno notting, dass wen you goin start fo learn. Da way da peopo inside da world tink, God say dat stuff stay stupid. Da Bible say:
“Da smart guys, dey sly buggas,
But God take wat dey do an jam um up!” (Letta Numba 1 Fo Da Corint Peopo 3:18-19)

God give us guys chance: But den, God wen come show us guys how plenny love an aloha he stay get fo us, an make good to us. He da one dat take us guys outa da bad kine stuff we stay do. God wen take us outa da bad kine stuff, but not cuz we wen do good kine stuffs. He wen do dat cuz he like give us chance. He do um by his Good an Spesho Spirit, who wen clean us up an make us jalike new inside, jalike we wen born again. (Letta Fo Titus 3:4-5)

God, jalike one good fadda fo us guys:
Jesus wen teach lidis: "So, pray lidis:
God, you our Fadda.
You stay inside da sky.
We like all da peopo know fo shua how you stay,
An dat you good an spesho inside,
An we like dem give you plenny respeck.
We like you come king ova hea now.
We like everybody make jalike you like,
Ova hea inside da world,
Jalike da angel guys up inside da sky make jalike you like.
Give us da food we need fo every day.
Let us go, an hemo our shame
Fo all da kine bad stuff we do to you,
Jalike us guys let da odda guys go awready,
An we no stay huhu wit dem
Fo all da kine bad stuff dey do to us.
No let us get chance fo do bad kine stuff,
But take us outa dea, so da Bad Guy no can hurt us.
Cuz you our king,
You get da real power,
An you stay awesome foeva.
Dass it!" (Matthew 6:9-13)

[God,] he give us good kine words weneva we get hard time, an cuz a dat, we can give good kine words to da odda peopo dat get any kine hard time. We give dem good kine words jalike God wen give us. (Numba 2 fo da Corint Peopo 1:4)

An I wen hear one loud voice coming from da throne dat say,
“Now God make house wit da peopo.
An he goin live wit dem.
Dey goin be his peopo,
An God goin stay dea wit dem fo real,
An be dea God.
God goin wipe away all da tears from dea eye.
Nobody goin mahke no moa.
Nobody goin stay sore inside,
O cry, o suffa,
Cuz da way tings wen happen befo,
All dat goin pau.” (Wat Jesus Show John 21:3-4)

Eh! You tink you stay strong now. But you gotta watch out so you no do bad kine stuff. Wen you guys get chance fo do da bad kine stuff, dass da same ting, jalike wat happen to all da odda peopo. But you know, you guys can trus God fo do wat he say. He no goin let you guys get so plenny presha dat you guys no can handle. Everytime get presha lidat, God goin make um so you guys can get outa dat. He goin make you guys strong fo handle, an no fall down. (Numba 1 Fo Da Corint Peopo 10:12-13)

God da Boss: "So, eh! no go worry an say, 'Wat we goin eat?' o 'Wat we goin drink?' o 'Wat we goin wear?' You know, da odda peopos all ova da world, dey try get all dat kine stuff. But yoa Fadda inside da sky, he know you guys need um. Main ting, make God yoa Boss, cuz he da King. Do da right ting jalike he do, an you guys goin get all da stuffs you need." (Matthew 6:31-33 )

Jesus tell him, "Da main Rule dis: 'Listen, all you Israel peopo! Da Boss Up Dea, he our God, an he da one an ony Boss. Get love an aloha fo da Boss yoa God, wit all yoa heart, an wit everyting inside you, an wit how you tink, an wit all yoa power.' An da nex main Rule jalike dis one, 'Get love an aloha fo da odda guy jalike you get love an aloha fo yoaself.' No mo odda Rule, mo importan den dis two Rules." (Mark 12:29-31)
So den, my good friends, you guys everytime stay doing wat God wen tell you guys. Wen I wen stay wit you guys, you guys wen make lidat. An now, wen I no stay wit you guys, you guys stay doing um even mo plenny. Do everyting you guys gotta do, cuz God stay taking you guys outa da bad kine stuff, an do um jalike you guys stay scared an shaking in front God. God, you know, he da One making you guys so you like do da tings dat he like, an helping you guys fo go do um. (Letta From Paul Fo Da Philippi Peopo 2:12-13)

Real Kine Life   God   Jesus   Da Bible   Praying   Do Wat Christ Like

Jesus

God, he jalike Jesus: Jesus wen talk loud an say, "Whoeva trus me, he no trus ony me, but he trus da One dat wen send me hea too. Whoeva see me, he see da One dat wen send me hea too." (John 12:44-45)

Befo time, God wen make his talka guys write his Good An Spesho Bible fo um. Dat time, God wen promise um dat bumbye he goin tell peopo da Good Kine Stuff bout his Boy. His Boy's blood come from King David. But how his spirit stay, an da way he stay good an spesho fo God, dass wat show dat he God's Boy. We know dat, cuz God wen use plenny power fo make um come back alive afta he wen mahke. You know, I stay talking bout Jesus Christ. He da Spesho Guy God Wen Send. He stay da Boss fo all us guys. (Fo Da Rome Peopo 1:2-4)
Jesus wen go mahke fo help us guys: Wen we neva have power notting, Christ wen mahke fo all us guys dat wen ack jalike God no matta. Dass da time God wen pick. Eh you know, nobody goin mahke fo one guy dat ony do right kine stuff! If get one guy dat everytime get good heart, maybe bumbye somebody go mahke fo help dat kine guy. But den God wen show how plenny love an aloha he get fo us, cuz same time we was doing bad kine stuff, Christ still yet wen go mahke fo us." (Fo da Rome Peopo 5:6-8)

You guys know dat Christ wen pay fo cut you guys loose from da bad wase time kine life dat yoa ancesta guys wen leave you. But Christ neva pay fo you guys wit da kine silva o gold money dat goin pau, you know. But he wen pay fo you guys wit his own blood. Dat cost plenny. He wen mahke, jalike one good kine baby sheep dat no mo notting wrong wit um an dey kill fo da sacrifice. (Letta Numba 1 from Peter 1:18-19)

God, he wen go send his own Boy fo come one guy jalike us. Da way Jesus wen stay, God wen make him look jalike one regula guy dat can do bad kine stuff, jalike all da odda peopo. But den, Jesus neva do bad kine stuff -- how he wen live, he wen show proof dat da tings da peopo was doing was bad fo shua. Plus, he wen come one sacrifice fo hemo da shame fo da bad kine stuff dat all da odda peopo wen do. God wen send Christ fo mahke so us guys can do all da right kine stuffs God's Rules say we gotta do. Now, we stay doing da kine stuff God's Spirit like us do, not da kine stuff we do wen we live da way we like. (Fo da Rome Peopo 8:3-4)

God wen plan um long time ago, cuz he wen know dey goin give Jesus ova to you guys. An you guys wen take him an let da bad kine guys kill him on top one cross. But God wen make him come back alive again from mahke. He no need suffa an mahke again, cuz a wat God wen do. He no can stay mahke, cuz he mo strong. (Jesus Guys, Wat Dey Wen Do 2:23-24)

Christ wen come,
Wit one body jalike us.
God's Spirit wen show proof dat Christ stay right.
Da angel guys from God wen see him.
His guys wen teach
Da diffren peopos all ova da world bout him.
Get peopo inside da world dat trus him.
God wen take him back
To da awesome place inside da sky. (Numba 1 fo Timoty 3:16)

Jesus tell um, “You know, I da Guy Who Fo Real. Wen I come back, I goin be awesome. All da angel guys goin come wit me. Den I goin sit down on top my throne dat stay awesome. (Matthew Tell Bout Jesus 25:31)

[Jesus,] he tell um, “All dis happen jalike I wen tell you guys wen I stay wit you. Everyting Moses wen write inside da Rules, an everyting da odda guys dat wen talk fo God wen write down, an everyting dat get inside da Songs fo God -- all da stuff dat stay from befo time inside da Bible, all dat, talk bout me! An everyting dey wen write, goin happen!” (Luke Tell Bout Jesus 24:44)

Garans everybody gotta mahke ony one time, an afta dat, dey gotta go in front God da Judge. So Christ wen come one sacrifice ony one time, fo throw out da bad kine stuff plenny peopo wen do. An he goin come back hea one mo time, not fo throw out da bad kine stuff, cuz he wen do dat awready, but he goin come back fo hemo da peopo dat stay waiting fo him, from da bad kine stuff. (Fo da Hebrew Peopo 9:27-28)

Jesus stay alive: Da angel guy tell da wahines, "Eh, no scared! I know you guys looking fo Jesus, da guy dey wen kill on top da cross. Eh, he no stay ova hea, cuz God wen make um come back alive, jalike Jesus wen say befo time. Come! Try look da place wea he wen lay. Den eh, go hurry up! Tell da guys he wen teach, dat God wen make um come back alive from mahke awready." (Matthew 28:5-7)

Jesus make us come jalike we new inside: Dass why, whoeva stay tight wit Christ, dey one new guy. Da old tings no stay no moa! Look! Da new tings wen come. All dat stuff come from God. He wen bring us back togedda wit him cuz a wat Christ wen do. An he tell us fo work so da odda peopo can come back togedda wit him too. Wen Christ wen stay inside dis world, God wen use him fo bring da peopo inside da world back togedda wit him. So, he no make dem take da blame fo da way dey wen mess up. An he wen tell us guys all dat, so we can kokua all da odda peopo fo come back togedda wit him. (Numba 2 fo da Corint Peopo 5:17-19)

Now you guys stay do da new kine way. You jalike one new guy. God da One wen make you guys da first time, an now he everytime stay make you guys know him mo betta, an come mo an mo jalike him. Inside Christ's new way, no matta if one guy Jewish an da odda guy not Jewish, if one guy get cut skin mark an da odda guy no mo da cut skin mark, if one guy come from one far place an one nodda guy come from even mo far like Sytia, if one guy one slave guy an one nodda guy not. Christ da ony ting dat matta, an he stay tight wit all dese kine peopo. (Fo da Colosse Peopo 3:10-11)

Jesus get power -- da kine power ony God get. Az how he wen give us guys everyting we need fo live to da max fo real kine, da way God like. God do dat, cuz us guys know him real good. He da One dat wen tell us guys “Come, be my guys,” cuz he so awesome, an so good. Jesus wen give us all da real importan stuff he wen promise, an dass worth plenny. An he wen give us all dat so us guys can come jalike God inside our heart. An same time, we can hemo from all da rotten pilau tings da peopo all ova da world do, cuz dey make any kine how dey like. (Letta Numba 2 from Peter 1:3-4)

I no shame notting bout da Good Kine Stuff From God. Dat stuff get plenny power from God, fo take peopo outa da bad kine stuff dey stay doing, wen dey trus him. Was da Jewish peopo dat wen find out bout um first, an afta dem, all da odda peopos from diffren places too. You tink bout all dis Good Kine Stuff From God, you goin undastan wat God wen do fo make peopo come right wit him. But gotta trus him from da start to da end. Da Bible wen say dis befo time:
“Gotta trus God.
Den you goin get um right wit him,
An you can live fo real kine.” (Fo Da Rome Peopo 2:16-17)

Jesus Christ, he da Spesho Guy God Wen Send, I like him do plenny good tings fo you guys. He da One dat tell da truth bout wat God tell him. He da first One dat wen come back alive from mahke. He da main leada ova all da kings inside da world. He da One dat get love an aloha fo us guys. He wen bleed an mahke, an make us clean from all da bad kine stuff we wen do. (Wat Jesus Show John 1:5-6)

You know, cuz us guys stay tight wit God's Spesho Guy Christ, he give us plenny good kine words. He show love an aloha fo us guys, so we no need stay sore inside. God's Spirit help us all come togedda. An we all feel aloha an pity fo each odda deep inside. (Fo Da Philippi Peopo 2:1)

I strong nuff fo handle any kine, cuz I stay tight wit Christ, an he give me da power fo do um. (Fo Da Philippi Peopo 4:13)

Jesus tell, “My Fadda give me everyting, you know. Nobody know me like my Fadda know me. An nobody know my Fadda fo real kine, ony me, I know him, an da peopo I like show him, dey know him too.” (Luke Tell Bout Jesus 10:22)

Jesus take care our problems: Cuz everybody do bad kine stuff. Dass why nobody can come awesome by demself, da way God like make um come awesome. But can get um right wit God cuz God get good heart an like do plenny good stuff fo peopo. God cut um loose from da power da bad kine stuff get ova dem, cuz dey tight wit Jesus Christ. God wen make Jesus da main guy, so he can be da One fo throw out all da bad kine stuff everybody do, ony if dey go trus him an dey shua dat he wen go bleed an mahke fo dem. Dass how God show dat he make everyting come right: he hemo dea shame an let um go fo da bad kine stuff dey wen do befo time. (Fo da Rome Peopo 3:23-25)

"Dass right! An I tell you guys dis: Whoeva hear wat I say, an trus God who wen send me, dey get da kine life dat stay to da max foeva. God no goin punish dem. Dey no stay mahke no moa. Dey stay live now fo real kine." (John 5:24)

Jesus wen hear dat, an he tell um, "Da guys dat not sick no need docta, ony da sick guys need docta. Go figga dis dat God's talka Hosea wen say befo time, 'I like my peopo give chance to each odda. Dat mo betta den jus make sacrifice inside da temple.' Dass wat God say. But me, I neva come fo tell da guys dat everytime do wat God say fo come by me fo be my guys, but I wen come fo da peopo dat get bad name." (Matthew Tell Bout Jesus 9:12-13)

Jesus give us guys da trut: Den Jesus tell da Jewish peopo dat wen trus him, "If you guys stick wit me an da stuff I teaching you, den you goin be my guys fo real kine, an you guys goin learn mo plenny stuff from me. You guys goin know da true stuff, an den you guys no need be slave guys no moa." (John 8:31-32)

An you know wat? One guy go by Jesus, an say, “Eh, Teacha! Can aks you one question? Wat good ting I gotta do fo live to da max foeva?”
Jesus say, “How come you aks me bout da 'good ting'? Ony get one Guy dat stay good fo real kine, dass God. If you like live to da max foeva, you know God's Rules. Go do um, den.”
Da guy say, “Wat rules?”
Jesus say, “No go kill nobody, no go fool aroun behind da odda's back, no rip off nobody, no bulai any kine bout nobody, show respeck fo yoa mudda an fadda, get love fo da odda guy jalike you get love fo yoaself.”
Da young guy say, “Ho, Teacha! I do all dat stuff. Wat mo I gotta do?”
Jesus tell um, “If you like come perfeck kine, go sell all da stuffs you get, an give da money to da peopo dat no mo notting. Den come wit me fo be my guy. An garans you goin get da real kine rich stuff in da sky.” Da young guy wen hear dat, an he wen come real sad, so dat he wen go way, cuz he get plenny rich stuffs dat he neva like sell. (Matthew Tell Bout Jesus 19:16-22)

Da peopo wen bring dea small kids by Jesus, cuz dey like fo him put his hands on top dea heads an pray fo dem. Wen Jesus guys see dat, dey wen scold da peopo cuz dey wen do dat. But Jesus tell da kids fo come, an he say, “Let da small kids come by me, an no stop dem, cuz da peopo dat get God fo dea King, inside demself dey jalike dese kids. Dass right! An I like tell you guys dis too: Whoeva no take God fo be his King jalike one small kid, he no can get God fo his King.” (Luke 18:15-17)

[Jesus say:] “So you know, whoeva hear wat I say, an go do um, he jalike one smart guy dat make plan, den he build his house on top wea stay solid rock. Da rain wen come, an get plenny water, an da wind wen come from all ova da place, an wen pound da house hard. But da house no fall down, cuz he wen build um wea stay solid rock.
“All da guys dat hear wat I say, an no do um, dey jalike one guy dat not tinking, an he build his house wea ony get sand. Da rain wen come, an get plenny water, an da wind wen come from all ova da place, an pound da house hard. Az da house dat wen fall down an wen wipe out!” (Matthew Tell Bout Jesus 7:24-27)
 

Real Kine Life   God   Jesus   Da Bible   Praying   Do Wat Christ Like

Da Bible

Check um out: Da Berea peopo, dey mo betta den da Tessalonika peopo, cuz dey wen like take in da Good Stuff Bout Jesus, an dey wen check out wat da Bible wen say from befo time, every day, fo find out if wat Paul wen say stay true. (Jesus Guys, Wat Dey Wen Do 17:11)

So da smart kine stuff from God stay hide from befo time, jalike da Bible wen tell,
“Get tings you neva see,
Get tings you neva hear bout,
You no can even tink how unreal dis ting goin be.
Dass da kine stuff God wen make ready
Fo us guys dat get love an aloha fo him.”
But us guys, God show us all da stuff we neva know befo time, cuz God's Spirit stay in charge a us. (Letta Numba 1 fo da Corint Peopo 2:9-10)

Real Kine Life   God   Jesus   Da Bible   Praying   Do Wat Christ Like

Praying

Cuz we Jesus guys: "Wen dat time come, you guys no goin aks me notting. Dass right! I tell you guys, wateva you guys aks my Fadda, he goin give um to you guys, cuz you my guys. Befo now, you guys neva aks fo notting cuz you my guys. Aks now, an you guys goin get um, so you guys can stay real good inside." (John 16:23-24)

God's Spirit help us guys fo pray good: Same ting, God's Spirit help us plenny, cuz we no mo power. We donno how fo pray da right way. But God's Spirit, he go take ova an aks God fo do good tings fo us, no matta we jalike get big pain inside dat make us so we donno how fo say um. An God, he know all da tings dat us guys like say inside our heart, an he know how his Spirit tink. Dass how God know everyting his Spirit like say fo help us, cuz God's Spirit tink jalike God tink, an da Spirit talk to God an aks him fo help da peopo dat stay spesho fo God. (Letta From Paul Fo Da Rome Peopo 8:26-27)

"Fo stand strong, everytime, pray an stay tight wit God's Spirit. Pray bout everyting, an aks God fo help you. Make shua you guys watch out, an hang in dea an pray fo God's spesho peopo." (Fo da Efesus Peopo 6:18)
 
Pray da way God like you fo pray: "Everytime we aks God fo do da tings he like make happen, we know fo shua dat he hear us. An if we know dat he stay listen fo wateva we aks him, den we know dat we goin get da tings we wen aks him fo do." (Numba 1 from John 5:14-15)

An one mo ting, bruddas an sistas. Aks God fo kokua us guys, so den peopo all ova da place goin know how awesome da stuff dat us guys telling um from da Boss, jalike wen happen wit you guys. (Numba 2 fo da Tessalonika Peopo 3:1)

Let God take care you: "Eh, no worry bout notting! Mo betta, everyting dat happen, pray bout um, an aks God fo do wateva you guys like him fo do. An same time, no foget tell him, "Mahalo plenny!" Den, God goin make you guys hearts rest inside. Dat goin be mo betta den anybody can figga. Jalike God goin take care yoa hearts an yoa heads, cuz you guys stay tight wit his Spesho Guy Jesus Christ." (Fo da Philippi Peopo 4:6-7)

Dat mean, if you talk strait wit yoa own mout, “Jesus, he my Boss,” an you trus deep inside yoa heart dat God wen bring Christ back alive afta he wen mahke, den God goin hemo you from da bad kine stuff you stay doing. (Fo Da Rome Peopo 10:9)

"If one a you guys donno wat fo do, aks God fo help, fo give you da smarts you need! He no goin give you guys hard time. He goin help you guys. God give plenny to everybody, you know." (James 1:5)

“Da peopo dat know dey need God inside dea heart,
Dey can stay good inside
Cuz God in da sky, he dea King.
“Da peopo dat cry inside dea heart,
Dey can stay good inside
Cuz God goin kokua dem.
“Da peopo dat no need put demself first everytime,
Dey can stay good inside
Cuz God goin give um da whole world.
“Da peopo dat everytime really like do da right ting,
Dey can stay good inside
Cuz God goin help um do um.
“Da peopo dat pity da odda peopo, an give um chance,
Dey can stay good inside
Cuz God goin pity dem an give um chance too.
“Da peopo dat hundred percent fo God inside,
Dey can stay good inside
Cuz dey goin see God.
“Da peopo dat help da odda peopo come friends again,
Dey can stay good inside
Cuz God goin say, `Dey my kids.'
“Da peopo dat do right, an suffa fo dat,
Dey can stay good inside
Cuz God in da sky, he dea King.
“You guys can stay good inside wen dey talk bad to you guys, an make you guys suffa, an dey talk any kine bout you guys, cuz you guys mines, but dey bulai. Dance an sing, cuz bumbye God goin have plenny good kine stuff fo you guys wea he stay inside da sky. Eh, jalike befo time, da guys God wen send fo talk fo him long time ago, had peopo dat wen make dem suffa too. (Matthew Tell Bout Jesus 5:3-12)

But you guys, wen you pray, go inside yoa room an close da door. Den pray to yoa Fadda. He stay inside da room wit you, wea da odda guys no can see, an he goin give you plenny fo dat. Cuz yoa Fadda can see wat da odda guys no can see. (Matthew Tell Bout Jesus 6:6)

First, I tell da peopo fo pray fo everybody, fo everyting dey need. Dis wat I tell um: Go aks God fo wateva you guys need. Make shua you guys pray to him wit respeck. Aks him fo do good tings fo odda peopo. Tell God, “Mahalo plenny!” Pray lidat fo da kings an all da odda leada guys, so we can stay good everytime, an our heart stay rest inside. Den mo easy fo do da way God like, an fo be solid kine peopo, so dat da odda peopo get respeck fo us guys. (Letta Numba 2 Fo Timoty 2:1-2)

Real Kine Life   God   Jesus   Da Bible   Praying   Do Wat Christ Like

Do Wat Christ Like

Hang In Dea: "So den, bruddas an sistas, my good friends. Stand strong an solid. No let notting shake you guys up. You guys stay working fo da Boss awready, so den, go do mo an mo plenny good kine stuffs fo him everytime. You guys know dis: Wen you guys stay tight wit da Boss, no matta you work hard an sweat plenny, no goin be wase time!" (Letta Numba 1 fo da Corint Peopo 15:58)

Live fo God: "Bruddas an sistas, so den, wat? God, he give you guys plenny chance. Az why I like aks you guys, let God take ova you, jalike you giving one sacrifice, but alive. But you know wat God like you guys do? He like you guys go all out fo God. Fo make lidat, good you know, cuz dat fo show God love an respeck." (Da Letta From Paul Fo Da Rome Peopo 12:1)

Our God wen tell you guys awready, “Come! Be my guys!” Dass why we stay aks God fo make you guys da right kine peopo so you can do wat he like. We pray fo God's power fo help you guys do all da good kine stuff you like do cuz you guys stay trus him. (Numba 2 fo da Tessalonika Peopo 1:11)

Moses wen figga, mo betta he stick wit God's peopo, an suffa plenny wit dem, den he do da bad kine stuff dat feel good, but no last. (Da Letta Fo Da Hebrew Peopo 11:25)

No bulai yoaself. Nobody goin make fun a God. Jalike da farma get back da same kine crop he wen plant, everybody goin get back da same kine ting he wen do. Cuz whoeva stay doing da bad kine stuff dey like, dey goin wipe out from da bad kine stuff dey do. But whoeva stay doing wat God's Spirit like, God's Spirit goin give dem da real kine life dat stay to da max foeva. We gotta hang in dea, an no get worn out doing da good kine stuff. Cuz bumbye we goin get wat we work fo, if we no give up. (Fo da Galatia Peopo 6:7-9)

You know, da leadas fo da peopos dat donno God, dey get any kine power ova dea peopo. Dea main guys get da rights fo tell da peopo wat fo do. But you guys, no goin be lidat wit you. Wit you guys, whoeva like be da leada guy, he gotta be da helpa guy first. Wit you guys, whoeva like be da numba one guy, he gotta do wat you guys tell him. (Mark 10:41-44)

Eh, no worry bout notting! Mo betta, everyting dat happen, pray bout um, an aks God fo do wateva you guys like him fo do. An same time, no foget tell him, "Mahalo plenny!" Den, God goin make you guys hearts rest inside. Dat goin be mo betta den anybody can figga. God goin take care yoa hearts an yoa heads, cuz you guys stay tight wit his Spesho Guy Jesus Christ. So den, tink bout all dese kine stuffs -- wateva stay true, wateva get respeck, wateva stay right, wateva no stay pilau, whoeva you get aloha fo, wateva you talk good bout, wateva da bestes kine, weneva peopo can say, "Dass good!" -- tink everytime bout all dat kine stuff. Everyting you guys wen learn from me, everyting I wen give you guys, everyting you wen see an hear wen I was wit you guys -- go do um! Den, da God dat can make you guys hearts rest inside, he goin stay wit you guys. (Fo da Philippi Peopo 4:6-9)

Do Da Right Ting: Da stuff God stay doing stay solid, jalike one building dat get solid foundation undaneat an no can move, yeah? An on top dat foundation, get one sign dat say two tings. One side say,
"Da Boss, he know all his peopo."
An da odda side say,
"Anybody who say, 'I da Boss's guy,'
Dey gotta stop doing everyting dat no stay right." (Letta Numba 2 fo Timoty 2:19)

Kay den. Make shua all you brudda an sista guys stay showing love an aloha fo each odda. (Fo Da Hebrew Peopo 13:1)

No let odda peopo bodda you. Somebody give you problem, eh, let um go, an no stay huhu. Da Boss wen let you guys go, so den you guys, go make jalike him. Get plenny love an aloha fo everybody, cuz dat make all da odda stuff come togedda good. (Fo Da Colosse Peopo 3:13-14)

You tink get somebody who smart an know wat fo do everytime? Kay den. Da guy betta do da right ting everytime, so he can show proof dat he get da smarts from God fo know wat fo do, an he no need be da numba one guy. (James 3:13)

You guys jalike da light dat help da peopo all ova da world fo see. You no can hide one town on top one hill. Same ting, you no light one lamp an den cover um up. You put um up on top one high place, yeah? Den everybody inside da house can see. So, you guys jalike da light. Let everybody see da good kine stuff you guys doing. Den dey goin say dat yoa Fadda, God, dat stay in da sky, eh! he awesome! (Matthew 5:14-15)

Cuz God like do plenny good kine stuffs fo us guys, he teach us fo say, "No way!" to da kine stuff dat God no like, an "Not even!" to da bad kine stuff da peopo inside dis world like do. He teach us fo take charge a how we live, fo do da right tings, an fo do da kine stuff dat he like, hea inside da world nowdays. (Fo Titus 2:12)
 

Get odda stuff from da Bible dat you tink can help peopo? Make one message fo us guys an bumbye we put um inside dis page.


© 2000-2009 Pidgin Bible Translation Group                      Site map                                         Send message to us guys