Da Jesus Book cova    Who Make?      Da Jesus Story CD cova
Like Help? ]

Who Make Da Pidgin Bible?

From 1987, get 27 local peopo dat help fo make da Pidgin Bible. Dey da Pidgin Bible Translation Group. Dey all volunteer peopo dat stay talk Pidgin from small kid time. Dey give couple hour every week fo translate. Dey Christian peopo dat go diffren churches, but dey all working togedda. Dis picha, from da time some a dem get dea copy a Da Jesus Book, firs time.

(Picha from Chuck Grimes, June 30, 2001)

Some a dem live odda place now, some a dem get job dat no let um get time fo translate, an Auntie Rachel Silva, she mahke awready 1994. March 2000, dey pau make Da Jesus Book. June 2001, get um back from da printa guys. Firs time, Wycliffe print 7,000 books, an da book store guys hea sell um all. Den dey print 10,000 books so peopo can give um to dea ohana Christmas time, den 10,000 moa, two time, den 5,000 moa, den 20,000 moa two time. Now, da book store guys wen sell mo den 60,000!

Seven translata guys stay working awready fo make Da Befo Jesus Book. Dey awready translate Da Befo Jesus Book firs time, but gotta polish an check um out plenny wit da Hebrew language an da commentary kine books, so try wait.

Da Pidgin Bible Translation Group work togedda wit da Wycliffe Bible Translators guys Joe an Barbara Grimes. Jalike dey da coach guys fo da team. Dey teach da local translata guys how fo do good job, an dey help um fo check out everyting an make shua stay OK.

Leon Siu an David Lancaster, dey da audio guys fo Da Jesus Story. Lou Ann Ka`aloa, she help make um too, an Malia Elliott set um up fo make plenny copy.

Da Wycliffe guys send odda helpa guys fo help make da translation mo betta. Marge Crofts wen come hea from Asia fo check out 19 part a Da Jesus Book wit da translata guys. She use da e-mail fo help plenny wit Da Befo Jesus Book too. Befo time, Jerry Allen wen come from Papua New Guinea fo check out Matthew Tell Bout Jesus, dass da firs part a Da Jesus Book. Steve Swartz from Australia wen tink fo come hea, but no can, so he send plenny e-mail message fo check out da odda 7 parts wit da translata guys.


2000-2009 Pidgin Bible Translation Group                      Site map                                         Send message to us guys